Төрсний бүртгэл
2022-11-10
Бүгд Найрамдах Итали Улсад байнга оршин суугаа Монгол Улсын харъяат иргэдээс төрсөн хүүхдийг эцэг, эхийн хүсэлтийг үндэслэн төрсний бүртгэлд бүртгэж, гэрчилгээ олгоно. Хүүхдийг төрснөөс хойш 30 хоногийн дотор бүртгүүлнэ.
Хүүхдийн төрсний бүртгэлийг хийлгэж, төрсний гэрчилгээ авахад дараах бичиг баримтыг бүрдүүлнэ:
1. Хүүхдийн төрснийг бүртгүүлж, төрсний гэрчилгээ авах талаар эцэг, эхээс ЭСЯ-ны нэр дээр гаргасан өргөдөл (Өргөдөлд эцэг, эх хоёр аль аль нь гарын үсэг зурж, өөрсдийн Бүгд Найрамдах Итали Улсад амьдарч буй хаяг, холбоо барих утасны дугаараа бичсэн байна)
- Гэрлэлтээ бүртгүүлсэн эцэг, эхээс гаргах өргөдлийн загвар
- Гэрлэлтээ бүртгүүлсэн эцэг, эхээс гаргах өргөдлийг бөглөх заавар
- Хүүхдийг эхээр нь овоглох тохиолдолд эхээс гаргах өргөдлийн загвар
- Хүүхдийг эхээр нь овоглоход гаргах өргөдлийг бөглөх заавар
- Гэрлэлтээ бүртгүүлээгүй эцэг, эхээс төрсөн хүүхдийг эцгээр нь овоглож бүртгүүлэх өргөдлийн загвар
- Гэрлэлтээ бүртгүүлээгүй эцэг, эхээс төрсөн хүүхдийг эцгээр нь овоглож бүртгүүлэх өргөдлийг бөглөх заавар
2. Төрсний гэрчилгээ авах мэдүүлгийг татан авч, үнэн зөв, бүрэн гүйцэд бөглөн хавсаргах (Мэдүүлгийг хэрхэн бөглөх заавартай сайтар танилцана уу)
3. Эцэг, эхийн иргэний цахим үнэмлэхний хуулбар
4. Эцэг, эхийн гадаад паспортын зурагтай болон визтэй хуудасны хуулбар
5. Бүгд Найрамдах Итали Улсад хэрэглэж буй ID Card
6. Эцэг, эхийн гэрлэлтийн гэрчилгээний хуулбар (гадаад улсад гэрлэлтээ бүртгүүлсэн бол тухайн улсад гэрлэлтээ бүртгүүлсэн гэрчилгээний хуулбар)
7. Хүүхэд Бүгд Найрамдах Итали Улсад төрснийг гэрчилсэн бичиг баримтын хуулбар (Birth certificate)
8. Үйлчилгээний хураамж төлсөн баримт (Үйлчилгээний төлбөр цэснээс харна уу)
Дээрх бичиг баримтыг бүрдүүлж, эцэг, эхийн аль нэг нь ЭСЯ-д аль болох өөрийн биеэр хүрэлцэн ирэх шаардлагатай.
Тайлбар: Хэрэв хүүхдийн эцэг, эх гэрлэлтээ бүртгүүлж, баталгаажуулаагүй бол, эсхүл хүүхдийн эцгийг тогтоосон эрх бүхий байгууллагын шийдвэргүй бол хүүхдийг эхийн нэрээр овоглож бүртгэх болно.Энэ тохиолдолд хүүхдийн эцэг тогтоох асуудал гардаг бөгөөд эцэг, эхийн аль алиных нь хүсэлтийг харгалзан хүүхдийг эхээр нь, эсхүл эцгээр нь овоглохыг шийдвэрлэдэг журамтай. Иймд гэрлэлтийн баталгаа чухал болохыг анхаарах нь зүйтэй.
ЭСЯ шинэ төрсөн хүүхдийг бүртгэж, төрсний гэрчилгээ олгосныг бүртгэх ИУБ-11маягт /Улсын бүртгэлийн ерөнхий газрын даргын 2010 оны 326 тоот тушаалын 1 дүгээр хавсралтаар баталсан маягтыг хэлнэ/-ыг дээрх баримт бичиг, эцэг эхээс өгсөн мэдээлэлд тулгуурлан бөглөж, Улсын бүртгэлийн ерөнхий газарт хүргүүлснээр шинэ төрсөн хүүхдийг Монгол Улсын иргэний бүртгэлд албан ёсоор бүртгэн баталгаажуулдаг журамтай.